miércoles, 9 de septiembre de 2015

WALLAQI - Receta en aymara

Elias Reynaldo Ajata Rivera
AYMAR YATIQAÑA

¿KUNANAKAS MUNASI?

Llätunk qarachi sutini challwanaka
Pä siwulla
Mä q’illu wayk’a
Llätunk sillp’irat ch’uqinaka
Mä jich’ ch’uñu
Q’uwa
Kuminu
Ajusa
Jayu

¿KUNJAMAS WAKTHAPIYAÑA?

Qalltañatakix, siwullanakaw mä chuwar khuchht’aña. Niy khuchhuñ tukuyxasax, mä phukhuruw thixikipañatak warantañaraki. Jan nakhantañapatakix, ukjat ukjatwa jirtaña. Sum q’aphiñapatakix, k’iyat ajusampi, q’illu wayk’ampi, kuminumpiw yapxataña. Janiw ancha thixikipañäkiti, phisqha k’atakiw nina patankañapa. Ukxarux, umarakiw phukhurux yapantaña. Mä juk’a pachatxa, jayunchxañarakiwa ukhamarakiw q’uwas apantxaña; ukanakampix wali sumaw wallaqiñapa, q’aphipas wali munkayañapawa. Challwanak apantañatakix 15 k’atanakaw mäkhipañapa, nayr apantatax challwanakax wali juchhaw tukxaspa, liwjkasax t’unanuqtapxaspawa. Challwanakax janiw jaya wallaqiyañakiti, mä juk’ wallaqt’ayasax phukhux ituqxañarakiwa.
Ukañkamax, ch’uqinakaw sillp’iraña. Yaqha phukhuruw umax warantaña, ukaruw ch’uqinakax uskuntañaraki. Jan t’aphañapatakisti, jayus uskuntañarakiwa. Ch’uñuxa suma sillp’iratañapawa. Ch’uqis kipkakwa yaqha phukhur wallaqiyañaraki ukhamarakiw jayuncht’aña. Akham wakicht’ayat manq’ax kimsa jaqinakatakiw jikt’añaparaki.

¿KUNJAMAS LIWJAÑA?

Liwjañatakix, sapa chuwaruw kimsa challwampi kimsa ch’uqimpi ch’uñumpi uskt’aña. Ukxarux, wallaqiyat umampirakiw warxataña. Ukatatx manq’t’asxaraksnawa. Niy uñjtanwa, wallaq phayañax janiw ancha ch’amakiti, laq phayir sipanx 30 k’atanakakiw munasiraki.

Facebookan aymar yatiqañatakix, aka chiqar mantam 
(PARA APRENDER AYMARA EN FACEBOOK, INGRESE A ESTE ENLACE):

https://www.facebook.com/groups/798450220168095/?fref=ts

PDF uñjañatak ukhamarak apaqañataki:
(PARA VER Y DESCARGAR EN PDF:)

     

No hay comentarios :